Na gyburstag...

Dzisioj byda pisać po naszymu - po ślonsku. Niy wiym, czy poradza tak blank gryfnie, jak niekierym to idzie, ale... byda próbować.

A pisza tak skuli tego, co moj ujek mo gyburstag i ta kartka je dlo niego...

Na Ślonsku kożdy mo swoj gyburstag, cołko familija przyłazi na fajer, winszuje i dowo roztomajte gyszyngi, bombony i kwiotki.

Kożdy gość dostowo tortynsztik. Na stole je połno kołocza, zisty i rozmaitych maszketów.

Kożdy godo jedyn bez drugiego, skuli tego je połno larma. Bajtle lotajom, starzyki godajom, jak to za staryj piyrwyj było, grugiorze durś fedrujom, a gołymbiorze ino o flugach fandzolom... 

Zarozki zaś je jedzynie, ale już niy do pomaszkecynia - tera je wuszt, kyjza, szałot i inksze jodło.

Kartka dlo ujka je tako blank poważno, bo to je poważny chop - nie dałach tu kwiotków ani żodnych szmaterloków - ino takie morskie zwierzynta.

Na tyj moi kartce winszowałach mu po polsku, ale tera byda po naszymu

Ujku, życza Wom:

 co by Ponboczek doł Wom fest zdrowia,

szczynścia, bo kożdymu sie przydo,

co by Wos bajtle suchały, choć som już srogie,

co by w Waszym bojtliku było blank pełno piyniyndzy
- ino tych rubych, a niy klepoków,

co by Wasze gołymbie najgipciyj furgały,
a cołki familija Wom pszoła.